Artistët / Himara International Music Festival 2023 /

Donika Rudi

është kompozitore kosovare e specializuar në muzikë akusmatike, elektroakustike. Që nga viti 2010 ajo është anëtare e FEBEME – BEFEM (Shoqata e kompozitorëve belg për Muzikë Elektroakustike) dhe anëtare e CEC (Komuniteti Kanadez Elektroakustik). Që nga viti 2010 ajo është Drejtoreshë e Festivalit ReMusica në Kosovë. Gjithashtu, ajo është artiste e asociuar për vitet 2020 -2024 në kuadër të IN SITU – Platforma Evropiane për krijimin artistik në hapësirën publike, udhëhequr nga publiku i Lieux në Francë. Rudi studioi kompozimin (muzikë instrumentale dhe elektroakustike) në Konservatorin e Muzikës në Gjenevë, Zvicër. Ajo ka përfunduar MA në Royal Conservatorium of Mons, Belgjikë, përkatësisht kompozimin në muzikë akusmatike me kompozitoren e mirënjohur Annette Vande Gorne. Disa nga veprat e saj më të rëndësishme janë: Baleti bashkëkohor “Life in Slow Motion”, dhënë premierë në Teatrin Kombëtar në Prishtinë; Veprat akusmatike “Emotion Machine “ mbështetur nga Wallonie Bruxelles; “Unspoken”, “The Echoes of the Crying Earth”, “Ode to Life” akusmatike / sound installation, mbështetur nga platforma IN SITU, në kuadër të projektit ACT, bashkëfinancuar nga Programi Creative Europe i Bashkimit Europian; veprat elektroakustike: “9” për trombon dhe elektronikë dhe“Aura I” për violinë, violë, mexosoprano, soprano, perkusion dhe elektronikë. Ajo ka kompozuar muzikë për drama, dokumentarë dhe filma të shkurtër. “In the name of the Father” docu-theater dhe vallëzim me regji të Darrel Toulon shfaqur në Sarajevo War Theatre October 2019; Srebrenica October 2019 Osijek Peace Awards 2020; dokumentari SARABANDE me regji të Kaltrina Krasniqit, INSANE – projekt multivizual me regji të Zineb Benzekri, janë vetëm disa prej krijimeve të saj në këtë zhanër. Kompozimet e Donikës janë interpretuar në Francë, Kolumbi, Zvicër, Portugali, Kosovë, Shqipëri, Itali, Australi, Bullgari, Serbi, Kanada, Spanjë dhe Belgjikë, si dhe janë transmetuar në Radio Spain – UNDÆ! Radio, France Musique (në radioshow Christian Zanési), Radio Kombëtare Holandeze “Sonema Lab” dhe Radio Kombëtare Portugeze (Arte Eletroacústica).

https://donikarudi.com

Doruntina Basha

është dramaturge dhe skenariste nga Prishtina. Ajo është autore e pesë shfaqjeve, duke përfshirë shfaqje për fëmijë dhe disa skenarë të shkurtër. Doruntina është gjithashtu bashkëautore e Travels to Unmikistan (2003), një projekt bashkëpunimi kosovaro-francez që u shfaq për herë të parë në Kosovë dhe më pas në Francë dhe u publikua në një botim dygjuhësh nga L’espace d’instant në Paris. Skenari i saj i shfaqjes Gishti (2011) u nderua me çmimin për skenarin më të mirë bashkëkohor për tema të angazhimit social (2011) në një konkurs të organizuar nga Fondi Heartefact në Beograd. Ajo gjithashtu fitoi Dafinën e Artë për skenarin më të mirë bashkëkohor ballkanik në Festivalin Ndërkombëtar të Teatrit MESS në Sarajevë (2013) dhe çmimin për skenarin më të mirë kombëtar në festivalin e teatrit Flaka e Janarit në Gjilan (2015). Premiera Gishtit u shfaq në Teatrin Bitef në Beograd në vitin 2012, e ndjekur nga produksionet në Teatrin Shqiptar në Shkup në vitin 2013, në Teatrin Sartr në Sarajevë në vitin 2014, në Teatrin Hundsturm në Vjenë si pjesë e triptikut Requiem Ballkanik në vitin 2014, në Teatrin Kombëtar të Kosovës në vitin 2015 dhe në Teatrin Eksperimental Kujtim Spahivogli në Tiranë në vitin 2018. Gishti pati realizimin e parë italian në Festival delle Colline Torinesi (Torino) në vitin 2019, dhe një të dytë në Teatro Mercadante – Teatro Stabile në Napoli në vitin 2020. Premierën në Amerikën e Veriut shfaqja e pati më 19 shtator 2019 në Venus Theatre në Laurel, Maryland. Skenari i saj është përkthyer në serbisht, BHS (boshnjakisht, kroatisht dhe serbisht), anglisht, frëngjisht, gjermanisht, italisht dhe turqisht. Skenari i saj Vera andrron detin u realizua në filmin nga regjizorja Kaltrina Krasniqi dhe është shfaqur në Festivalin e 78ë Ndërkombëtar të Filmit në Venecia. Ky film ka fituar Tokyo Grand Prix në Tokyo International Film Festival ndër shumë çmime tjera.

Kaltrina Miftari

është një soprano e talentuar e lindur në një familje artistësh. Dashuria e saj për muzikën filloi që në moshë të re kur mori pjesë në festivalin “Akordet e Kosovës”. Ajo është interpretuese e rregullt e korit dhe orkestrës së Filarmonisë së Kosovës. Kaltrina është ftuar për të performuar në festivale të shumta si Remusica, Chopin Fest, Dam, Kamerfest dhe ka bashkëpunuar me dirigjentë të ndryshëm në Kosovë dhe jashtë saj. Në vitin 2021, Kaltrina ishte pjesë e Operës Gala, e cila u mbajt për inaugurimin e Institucionit të Operas në Kosovë. Një vit më pas, ajo u shfaq si soliste në operën “La Traviata”, duke forcuar statusin e saj si një soprano e talentuar dhe e kërkuar. Së fundmi, Kaltrina ishte soliste në koncertin madhështor “Walking in Beauty”. Koncerti i mbajtur në Filharmoninë e Berlinit ishte një bashkëpunim me kompozitorin e mirënjohur Eriks Esenvalds. Aktualisht ajo është pjesë e Filharmonisë së Kosovës dhe anëtare e ReMusica Vocal Ensemble dhe ansamblit vokal “Dardanicum Cantori”.

Agnes Nokshiqi

është aktore, regjisore e teatrit, koreografe dhe performuese. Ajo ligjëron Lojëra Skenike dhe Artin Performativ si profesoreshë në Fakultetin e Arteve në Prishtinë Puna e saj fokusohet në performancën e trupit dhe të folurës, teksa eksperimenton me llojllojshmëri të formës artistike dhe mënyrës së shprehjes.

Hana Zeqa

është tërhequr gjithmonë nga ideja se si mund të rrëfejmë tregime të ndryshme përmes veshjeve. Përmes punës së saj, Zeqa i pozicionon veshjet si formë komunikimi dhe manifestimi: një mënyrë për të ndërfutur gjithçka prej kërcimit, historisë, psikologjisë, emocioneve dhe dramës në një kontekst vizual. Zeqa tërhiqet nga ana jokonvencionale të dizajnit. Duke i shtuar teknologjinë si aksesor, ajo e zgjeron mundësinë e të kthyerit të objektit si një mundësi për të shprehur një funksion, transformim dhe ndërveprim. Veçanërisht ajo është e interesuar në transformimin që imiton proceset e brendshme organike. Përmes punës së saj ajo frymëzon një analizë më të thellë dhe introspektive për të shqyrtuar ndjesitë, eksperiencat dhe rrethanat. Kjo e aktivizon aksesorët e saj të ‘flasin’ më vete dhe të jenë të qasshme jo vetëm si objekte.

ReMusica Vocal Ensmeble

DIELLZA SYLEJMANI VESELI alt
ENDRIT NURA tenor
KALTRINA MIFTARI soprano
NIKOLLE GJINI bas
RIZAH JAHAJ tenor
SAFET BERISHA tenor
SHABAN BEHRAMAJ bariton
SHKURTA HYKAJ REXHEPI soprano
RAFET RUDI dirigjent

Ansambli vokal ReMusica është ansambël i formuar nga Festivali ReMusica. Ai karakterizohet nga repertori i gjerë stilistik, duke filluar nga muzika e vjetër shqiptare – renesansë dhe barok, me kompozitoret Gjergj Danush Llapacaj dhe Jan Kukuzeli (i cili njihet si reformator i notacioni të kishës lindore), repertorin modern shqiptar, e deri te repertori botëror bashkëkohor. Nën udhëheqjen e dirigjentit Rafet Rudi, tetë profesionistë janë bashkuar për të shpalosur muzikën korale me një finesë dhe ndjeshmëri interpretative.

Rafet Rudi

në jetën muzikore të Kosovës, me veprimtarinë tij si kompozitor, dirigjent, mendimtar i shprehur në fushën e publicistikës dhe filozofisë së muzikës, anëtar i Akademisë Europiane të Shkencës dhe Arteve, paraqet personalitetin më të spikatur dhe më aktiv në 2-3 dekadat e fundit. Rudi ishte dirigjent i Korit Profesional të Radio Televizionit të Prishtinës (RTP) në periudhën 1980-1987 dhe me këtë ansambël koncertoi në të gjitha vendet e ish Jugosllavise. Ai ishte prezent në Festivalet e rëndësishme të kohës, si Festivali i Dubrovnikut, Ohrit, Beogradit, Festivali i muzikës moderne në Opati (Kroaci) etj. Në vitet 2006 – 2020, ai udhëheqë Korin e Filharmonisë të Kosovës dhe realizon qindra paraqitje publike me programe a capella në Kosovë, Angli, Maqedoni të Veriut, Kroaci, Shqipëri, Itali etj. Nën drejtimin e tij, Kori dhe Orkestra e Filharmonisë realizojnë një mori veprash të rëndësishme vokalo-instrumentale, si: Missa D-dur e Mozartit, ‘Vespro della Beata Virgine 1610’ e Monteverdit, Kantata Nr. 28 e Bahut, ‘Gloria’ e Vivaldit, Mesha C-dur e Beethovenit, Rekuiemi i Mocartit etj. Në vitet e fundit, Rudi i pëkushtohet pikërisht zbulimit, restaurimit dhe adaptimit të literaturës korale të autorëve të vjetër shqiptarë, si Gjergj Danush Llapacaj (shek. XVI), Jan Kukuzeli (shek. XIII) dhe Niketa i Remisianës (shek. IV).

Dorina Selimaj

është soliste pranë Teatrit Kombëtar të Operas dhe Baletit që prej vitit 2003. Ajo është pjesë e jetës artistike koncertore ku numëron shumë koncerte recitale në Shqipëri, Kosovë, Itali, Greqi, Rusi dhe Japoni. Ka bashkëpunuar me dirigjentë dhe regjisorë të njohur shqiptarë dhe të huaj. Karriera e saj shënon mbi 20 role të realizuara të repertorit lirik si: Elisetta te “Il matrimonio segreto”, Maria te “West Side Story“, Oscar te “Un ballo in maschera”, Fiordispina te “L’impresario in angustie“, Despina te ”Cosi fan tutte”, Zerlina dhe Donna Elvira te “Don Giovanni”, Pamina, Dama e pare dhe Papagena te “Die Zauberflöte“, Susanna te “Le nozze di Figaro“. Kate te “Kiss me Kate“, Polly te “Die Dreigroschenoper“, Lauretta te “Gianni Schicchi“, Nanetta te “Falstaff”, Hanna te “Die lustige Witwe“, Adele te “Die Fledermaus“, Antonia te “Les Contes d’Hoffmann“, Musetta te “La Boheme“, Micalëa te “Carmen“, Leonora te “Il trovatore“, Norina te “Don Pasquale“, Afrovitit te “Karnavalet e Korçës“, Gabriel dhe Eva te “Die Schöpfung“.

Formacioni i harqeve

ABIGEILA VOSHTINA, violinë
SARA HOXHALLARI, violinë
HERIDA DURO, violë
MARIO GURALUMI, violonçel

Formacioni i harqeve e daton aktivitetin e tij rreth viteve 2000, si nismë e disa studentëve të spikatur në Universitetin e Arteve në Tiranë. Në atë kohë ata dalluan për teknikat e tyre të jashtëzakonshme të performancës dhe stileve të veçanta individuale. Me kalimin e viteve, ndërsa fituan kualifikime dhe përsosje të mëtejshme në Akademi të ndryshme të njohura të Arteve në Evropë dhe duke ndjekur karrierën e tyre artistike në eksperienca të shumta Orkestrale dhe Teatrore, brenda dhe jashtë vendit, ata vijuan të ruanin një përkushtim unik ndaj muzikës së dhomës. Gjatë sezonit të fundit koncertor ata kanë performuar në evente dhe festivale të rëndësishme si Bienalja e Venecias, DAM Festival në Prishtinë, Teatri i Operas në Stara Zagora të Bullgarisë, Java Kombëtare Kulturore Shqiptare dhe Festivali i Qendrës Kulturore (QKI Malësija) në Mal të Zi.

Sebastian Ene

është një muzikant profesionist me rrënjë muzikore, artistike dhe kulturore nga Evropa Lindore si dhe Evropa Perëndimore. Pianist koncert, muzikant dhome dhe mësues piano, ai ia kushton jetën kuptimit dhe transmetimit të gjuhës muzikore. Studimet muzikore i kreu në Konservatorin Superior të Parisit duke qenë student i Roger Muraro dhe Isabelle Dubuis, Emmanuel Strosser dhe Cécile Hugonard-Roche. Në vitet e mëvonshme ai ka punuar me Michael Levinas, Jean-Claude Pennetier, Gabriel Tacchino dhe Corneliu Gheorghiu. Si pjesë e rëndësishme e dymbëdhjetë viteve të para të edukimit për piano në Rumani me Sorin Baroti dhe Magda Stanescu, ai ka marrë pjesë në më shumë se 15 konkurse kombëtare dhe shpesh ka fituar çmimin e parë. Për sa i përket muzikës bashkëkohore, takimet e tij muzikore me kompozitorët francezë Roger Tessier dhe Michael Levinas kanë qenë thelbësore. Falë përvojave me IRCAM në 2013 dhe 2014 pranë Michael Levinas, ai ka thelluar punen kërkimore dhe interesin e tij për tingujt dhe rezonancën e pianos. Një interes i gjerë muzikor dhe artistik shpesh e lejon Sebastian Ene të ndajë skenën me muzikantë të dhomës, aktorë dhe artistë. Ai ka performuar në Francë, Itali, Spanjë, Rumani dhe Suedi.

https://www.sebastianene.com

Rea Veizi

është pianiste shqiptare që jeton dhe zhvillon veprimtarinë e saj në Paris. E apasionuar pas transmetimit të gjuhës muzikore dhe komunikimit nëpërmjet saj, ajo i është dedikuar interpretimit pianistik dhe mesimdhenies. Një interes të veçantë për të kanë performancat multidisiplinore nëpërmjet te cilave ajo gjen një platformë të lirë krijuese dhe interpretuese. Si rrjedhojë në 2018 krijon shfaqjen “Alter” një ndërthurje mes muzikës, teatrit dhe projeksioneve numerike, e cila u luajt në Shqipëri dhe Kosovë. Prej vitit 2017 Reas i është besuar menaxhimi dhe drejtimi artistik i disa projekteve muzikore dhe pedagogjike brenda Konservatorëve ku jep mësim. Dymbedhjetë vitet e para të studimeve pianistike i kreu në Tiranë nën drejtimin e Valbona Simixhiut dhe Anita Tartarit, periudhë gjatë së cilës është vlerësuar me çmime të ndryshme në konkurse kombëtare dhe ndërkombëtare pianistike. Më vonë Rea vazhdon studimet e larta dhe diplomohet në Conservatorio Superior de Castellon me Leonel Morlaes në Spanjë dhe në Ecole Normale de Musique “Alfred Cortot” dhe Schola Cantorum me Marian Rybicki, Nina Patarcec dhe Billy Eidi në Francë. Rea ka luajtur në koncerte dhe festivale të ndryshme në Francë, Spanjë, Itali, Kosovë dhe Shqipëri.

Iliriana Gjoni

është një pianiste gjermano-shqiptare e lindur në Mal të Zi. Ajo është diplomuar me vlerësimet më të larta për piano dhe muzikë dhome në Universitetin e Muzikës Karlsruhe, Gjermani. Është fituese e shumë çmimeve të para si: disa herë Lirën e Artë në garat kombëtare në Mal të Zi, çmimin e parë dhe çmimin special “Beethoven” në konkursin EPTA Albania, si dhe çmimin e parë në konkursin ndërkombëtar pianistik në Guardiagrele, Itali. Iliriana ka studiuar me Boris Kraljevic dhe Lidija Skender në Mal të Zi, me Nora Çashkun në Tiranë si dhe me Michael Uhde dhe Markus Stange në Karlsruhe. Pas diplomimit, ajo fitoi një bursë nga qeveria italiane për të studiuar në Konservatorin “Luisa D’Annunzio” në Pescara. Paralelisht me studimet, ajo filloi edhe mësimdhënien dhe nxënësit e saj janë fitues në konkurse të ndryshme kombëtare gjermane. Iliriana shpesh ftohet për të qënë anëtare e jurive në konkurset për muzikantët e rinj në Gjermani. Në qershor 2015 ajo performoi në manifestimin “300 vjet Karlsruhe” i cili u mbajt para 40.000 njerëzve. Në 2016 ajo është bashkëthemeluese dhe performuese e rregullt në Festivalin Ndërkombëtar të Muzikës Klasike “Belcanto Dolcinio” në Ulqin. Në 2018 ajo debuton në Symphony Space në Nju Jork. Së fundmi ajo ka qënë pjesë e Fellowship-it për Diplomaci Muzikore të programit të Departamentit të Shtetit të SHBA, OneBeat. Që prej 2019 Iliriana banon në Bruksel, dhe përfundoi masterin për Studime Evropiane në KU Leuven me vlerësimin maksimal në 2020. Ajo është studiuese në Institutin e Qeverisjes Publike (KU Leuven) dhe së fundmi ka punuar në Njësinë e Mësimit dhe Zhvillimit të Parlamentit Europian.

Eliot Quartett

Themeluar më 2014, Eliott Quartett është një nga kuartetet e harqeve më të angazhuar dhe premtues të brezit të ri. I përbërë nga muzikantë nga Kanadaja, Gjermania, dhe Rusia, kuarteti ka fituar çmime në konkurse muzikore midis të cilëve çmimin e dytë në Konkursin Mozart në Salzburg dhe çmimin e dytë në Konkursin Ndërkombëtar të Muzikës së Dhomës në Melbourne. Kuarteti është fitues i tre çmimeve speciale në Konkursin Muzikor Gjerman dhe i çmimit të parë për interpretimin e një vepre të Szymanowski-t në Konkursin Karol Szymanowski. Eliott Quartett është kthyer në një faktor të pazëvëndësueshëm në jetën muzikore të qytetit të tyre, Frankfurt, ku më 2019 pati nderin të jetë i pari quartet in residence në kështjellëzën Holzhausen dhe të inagurojë stinën e vetë koncertore. Kuarteti është shfaqur në Bachfest Leipzig, Kasseler Musiktage, Styriarte në Graz, Mozartfest Würzburg. Rheingau Music Festival, Ludwigsburger Schlossfestspiele dhe në Schubertiade Schwarzenberg. Eliot Quartett ka studiuar me Hubert Buchberger dhe Tim Vogler në Universitetin e Muzikës dhe Arteve Performative në Frankfurt dhe ka ndjekur masterklase nga Günter Pichlern në Escuela Superior de Música Reina Sofia në Madrid. Ansambli ka përfituar impulse të vyera muzikore nëpërmjet bashkëpunimeve të ngushta me Alfred Brendel dhe Belcea Quartet. Eliot Quartett ka marrë emrin nga poeti amerikan Thomas Stearns Eliot, i cili gjeti frymëzim për veprën e tij të fundit poetike Four Quartets, nga kuartetet fundit të Ludwig van Beethoven. Regjistrime të ndryshme nga Eliot Quartett janë publikuar nga shtëpia diskografike GENUIN classics.

Endri Nini

është pianist i afirmuar dhe i vlerësuar me çmime të rëndësishme në konkurse ndërkombëtare si Concours „Ile de France” në Paris, Premio „Trio di Trieste” dhe Konkursi i Muzikës së Dhomës “K. Bacewicz” në Łódź. Ai ka studiuar me Anita Tartarin në Tiranë, Kevin Kenner në Londër, Sontraud Speidel në Karlsruhe, Bernd Goetzke në Hanover dhe ka marrë impulse të rëndësishme muzikore nga Stephen Kovacevich, Aldo Ciccolini dhe Andras Schiff. Endri Nini ka performuar me muzikantë të kalibrit të lartë si Albrecht Mayer, Sabine Meyer, Daniel Rowland, Gustav Rivinius, Kuartetin Berlin-Tokyo. Si solist ai ka luajtur me Orkestren Filharmonike në Baden-Baden, Orkestrën e RTSH dhe Orkestrat e Dhomës së Karlsruhes dhe Tiranës. Aktiviteti i tij artistik është pasuar me koncerte në salla prestigjoze dhe festivale në mbare Gjermaninë, Europën dhe Kinën, si Alte Oper Frankfurt, Concertgebouw Amsterdam, Beijing Performing Arts Center, Meistersingerhalle Nürnberg. Sommerliche Musiktage Hitzacker, Heidelberger Frühling, Annecy Festival, International Music Festival Goslar, Prussia Cove, Remusica Festival në Prishtinë dhe Podium Festival Esslingen. Nga 2012 deri më 2018 Endri ka qenë anëtar themelues dhe pianist i Flex Ensemble me të cilin ka fituar çmimet kryesore në konkurset e mëdha te muzikës se dhomës, si çmimin e parë në konkursin ndërkombëtar “Robert Schumann” në Frankfurt si dhe çmimin e parë në konkursin “Gianni Bergamo Classical Music Award “ në Lugano. Regjistrimet e tij përfshijne disa CD si dhe produksione për stacionet e radios gjermane SWR dhe NDR, Radio 4 Amsterdam, Radio Tirana dhe Radio Semnoz në Francë. Endri Nini është lektor i muzikës së dhomës në Universitetet e Muzikës në Rostock dhe Weimar pas një docenture në Akademinë Sibelius në Helsinki.

https://endrinini.com

Théo Ould

Vetëm 24 vjeç, Théo Ould është tashmë një nga përfaqësuesit më premtues të brezit të ri të fizarmoniçistëve. Në vitin 2023, ai u bë fizarmoniçisti i parë i nominuar për “Victoires de la Musique Classique” dhe nënshkroi me shtëpinë e produksionit Alpha Classics. Studimet muzikore i filloi në Konservatorin e Marsejës dhe në vitin 2015 vazhdoi të formohej në Konservatorin Superior Kombëtar të Parisit me Max Bonnay dhe Anthony Millet, ku u diplomua në vitin 2020 me çmimin e konservatorit. Njëkohësisht ai fiton bursë nga Fondacionit Banque Populaire. Shumë shpejt Théo filloi të performojë rregullisht në skena të ndryshme. Anthony Millet, një nga mësuesit e tij, e përfshin në një projekt të çmendur: Kuarteti Æolina ku katër fizarmonistë transkriptojnë dhe rijetësojnë vepra të mëdha orkestrale. Në vitin 2018, nga një histori miqësie dhe muzike lindi Trio Philia me të cilën regjistron albumin e parë, Madness, në bashkëpunim me Festivalin Auvers-sur-Oise, publikuar në Prill 2022. Në vitin 2020, takon klarinetistin e njohur Florent Héau me te cilin krijon një miqësi të vërtetë artistike. Përpos repertorit klasik, Théo bashkëpunon me kompozitorë bashkëkohorë si Régis Campo, Thomas Gubitsch dhe Philippe Hersant, duke pasuruar repertorin e instrumentit dhe duke nxjerrë në pah të gjitha aftësitë e tij. „Fizarmoniçisti ka energjinë dhe talentin të guxojë, të kapë lirshëm kodet e koncertit klasik, jo për të sakrifikuar muzikën, por përkundrazi për ta dëgjuar ndryshe atë; në rezonancë me kohën tonë.”