Sujari Britt

Sujari i filloi studimet e saj për violonçel në moshën katërvjeçare, duke treguar një talent të lindur që shënoi fillimin e një karriere të dalluar ndërkombëtare si soliste. Ajo mori diplomën Bachelor në Muzikë nga Manhattan School of Music, Master në Violonçel nga Sibelius Academy dhe Diplomë Profesionale nga Royal Academy of Music.

Në moshën tetëvjeçare, ajo u ftua nga Barack Obama për të performuar në Shtëpinë e Bardhe së bashku me Alisa Weilerstein, duke forcuar reputacionin e saj si një Wunderkind e muzikës klasike.

Ajo bashkëpunon me artistë dhe ansamble të njohura si New York Philharmonic, Joshua Bell, Midori, Gil Shaham, Kronos Quartet dhe Sting. Performancat e saj janë zhvilluar në skena prestigjioze si Carnegie Hall, Lincoln Center, Metropolitan Opera House dhe selia e Kombeve të Bashkuara në New York.

Si soliste, Sujari ka performuar në Shtetet e Bashkuara, Evropë dhe Azi me orkestra të njohura si Chicago Symphony, Cincinnati Symphony, West Michigan Symphony dhe Romanian Youth Orchestra. Ajo ftohet rregullisht në festivale të mëdha si Castleton Festival, Cellofest Helsinki, Beijing Super Cello Festival dhe Neopolitan Connection. Gjithashtu, ajo ka performuar në aktivitetet e Kombeve të Bashkuara për World Humanitarian Day dhe nismën HeForShe. Arritjet e saj janë pasqyruar nga media të rëndësishme si TIME, Strings Magazine dhe emisioni i NBC “100 History Makers in the Making”. Ajo është shfaqur gjithashtu në ABC, BBC Radio dhe si folëse e ftuar në TEDx.

Që nga viti 2021, Sujari ka bashkëthemeluar Accademia del Mediterraneo dhe Orchestra Filarmonica del Mediterraneo. Për më tepër, ajo drejton një iniciativë inovative globale së bashku me Dynamic Object Language Labs dhe profesorin Paul Robertson, duke eksploruar ndërthurjen krijuese midis muzikës dhe inteligjencës artificiale në koncerte live.

Wataru Mashimo

Wataru Mashimo i filloi studimet e pianos në Japoni, duke përsosur aftësitë e tij në Shkollën e Mesme të Muzikës pranë Universitetit të Arteve të Tokios nën drejtimin e Maestro Takashi Hironaka. Në moshën gjashtëmbëdhjetëvjeçare, ai u përzgjodh si një “talent i së ardhmes”, duke performuar çdo muaj në Tokio për dy vjet, duke filluar nga viti 2014, së bashku me violinisten Yoko Kubo dhe violonçelistin Ko Iwasaki.

Në vitin 2015, ai u pranua në Accademia Pianistica “Incontri col Maestro” në Imola. Në vitin 2022, u diplomua me notat më të larta, lavdërim dhe përmendje nderi (massimo dei voti, la lode e la menzione d’onore), duke u bërë studenti i parë që përfundoi programin trevjeçar të pianos pas ristrukturimit universitar të institucionit.

Gjatë studimeve në Imola, ai fitoi vlerësime në konkurse prestigjioze, përfshirë Konkursin e 29-të Clara Haskil në Zvicër. Në shtator 2025, fitoi çmimin e dytë në Konkursin e 33-të A. Casagrande në Terni. Ai ka performuar në festivale si “Young Prague”, “Mario Ghislandi” dhe “EstOvest Festival”, si edhe në salla dhe institucione të njohura si Pallati Wallenstein, Casa Mozart në Rovereto, Fondacioni Hindemith dhe sallonet Steinway në Vjenë dhe Milano.

Në vitin 2025, ai realizoi një turne me Orchestra Senzaspine, duke interpretuar Koncertin në Sol të Maurice Ravel-it. Gjithashtu, ka performuar me Orchestra da Camera di Imola, Zermatt Festival Orchestra, Orchestra Giovanile Italiana dhe Orchestra Sinfonica Abruzzese. Me mbështetjen e Agjencisë Japoneze për Çështjet Kulturore, ai ishte i ftuar i Fondacionit Lieven Piano dhe fitoi Çmimin Special në Festivalin Ndërkombëtar të Pianos së Mesdheut, si dhe çmimin “Artisti Premtues” në Roero Cultural Events.

Aktualisht, ai po ndjek studimet master në Accademia di Imola nën drejtimin e Ingrid Fliter, Leonid Margarius dhe Marco Zuccarini. Ai bashkëpunon në mënyrë aktive me shkollat lokale në projekte edukative të muzikës klasike.

Helix Trio

Helix Trio është një ansambël spanjoll i muzikës së dhomës me bazë në Zvicër, që po afirmohet me shpejtësi në skenën ndërkombëtare. I formuar në vitin 2022 në Hochschule für Musik FHNW Basel, trioja përbëhet nga Jaume Angelès Fité (violinë), Iago Domínguez Eiras (violonçel) dhe Paula Belzunegui Moreno (piano). Që nga dhjetori i vitit 2025, ata përfaqësohen nga Agencia Camera, një nga agjencitë më të rëndësishme të artistëve në Spanjë.

Ansambli ka fituar vlerësime të rëndësishme, ndër të cilat përfshihet shpallja si “Emerginng 2025” nga FestClásica. Sukseset e tyre përfshijnë gjithashtu Çmimin e Dytë në Premi BBVA de Música de Cambra Montserrat Alavedra 2024, Çmimin Filippo Nicosia në Itali, ORPHEUS Swiss Chamber Music Competition 2022 dhe konkursin La Flama 2023 në Barcelonë.

Aktualisht, ata vazhdojnë zhvillimin e tyre artistik në Bazel nën drejtimin e profesorëve të njohur si Anton Kernjak, Claudio Martínez-Mehner, Zoltán Fejérváry, Silvia Simionescu dhe Anna Gebert, si edhe Patrick Jüdt dhe Johannes Meissl. Që nga viti 2023, trioja është anëtare e ECMA (European Chamber Music Academy) dhe rrjetit Le Dimore del Quartetto.

Helix Trio ka performuar në salla dhe festivale të rëndësishme evropiane, përfshirë Palau de la Música Catalana, L’Auditori de Barcelona, Swiss Chamber Music Festival, Festivalin Ndërkombëtar të Santanderit dhe Quincena Musical de San Sebastián. Përveç kësaj, ata kanë marrë pjesë në masterclasse me muzikantë të shquar si Steven Isserlis, Heime Müller dhe Heinz Holliger.

Deniola Kuraja

Deniola Kuraja është një personalitet i gjithëanshëm artistik i cili bashkëvepron me dirigjimin orkestral, pianon, muzikën e dhomës dhe korrepeticionin vokal.

Veprimtaria e saj artistike shquhet për interpretimin e repertorit operistik, simfonik dhe instrumental, fusha në të cilat ka krijuar një përvojë të rëndësishme ndërkombëtare, duke bashkëpunuar me institucione prestigjoze europiane si Klassische Philharmonie Bonn, Niedersächsische Staatsorchester Hannover, Staatstheater Kassel, Hochschule für Musik, Theater und Medien Hannover, Teatri Kombëtar i Operas dhe Baletit dhe Universiteti i Arteve në Tiranë.
Ajo ka dirigjuar në sallat më njohura të Gjermanisë, si Konzerthaus Berlin, Laeiszhalle Hamburg, Konzerthaus Karlsruhe, Kurhaus Wiesbaden, Meistersingerhalle Nürnberg, Liederhalle Stuttgart, Die Glocke Bremen dhe Rudolf-Oetker-Halle Bielefeld. Gjatë karrierës së saj ka dirigjuar produksione operistike, koncerte simfonike dhe balete, ku përfshihen mbi 70 tituj operistikë.

Krahas aktivitetit si dirigjente, është angazhuar edhe si pianiste, duke e nisur aktivitetin koncertor që në moshë të hershme. Ajo është fituese e disa çmimeve kombëtare, si çmimi i parë në konkursin “Pianisti i Ri”, dhe çmimet i treta në konkursin “Çesk Zadeja” dhe në konkursin “Tonin Harapi”. Si soliste ajo ka interpretuar me Orkestrën Simfonike të Staatstheater Kassel, Orkestrën Simfonike të TKOB, Orkestrën Simfonike të Radiotelevizionit Shqiptar dhe Orkestrën e Universitetit të Arteve në Tiranë.

Studimet për dirigjim orkestral dhe interpretim i përfundoi me rezultate maksimale në Hanover nën drejtimin e Martin Brauß. Mbas diplomimit ajo angazhohet në Staatstheater Kassel, teatër që shënjon një etape të rëndësishme në konsolidimin e identitetit te saj artistik dhe te pranisë në skenën ndërkombëtare.

Evjord Ngjeliu

Evjord Ngjeliu është klarinetist, pedagog dhe interpret me veprimtari të spikatur ndërkombëtare, i cili e ka zhvilluar karrierën e tij artistike në Itali, Argjentinë dhe Shqipëri.

Karriera e tij përfshin një aktivitet të gjerë orkestral dhe solistik, duke bashkëpunuar me Orkestrën Shtetërore të Teatrit të Operës “Colón”, me Orkestrën Filarmonike të Teatrit “Colón” në Buenos Aires, Orkestrën e Filarmonisë “Gioachino Rossini”, Orkestrën Rinore të Konservatorit “Luigi Cherubini” në Itali, Orkestrën e Teatrit Kombëtar të Operas dhe Baletit dhe Orkestrën e Radio Televizionit Shqiptar në Tiranë.

Puna me dirigjentë të njohur si: Paolo Ciardi, Alessandro Pinzauti, Enrique Arturo Diemecke, Carlos Vieu dhe Javier Logioia ka shërbyer në konsolidimin e profilit të tij artistik dhe profesional.

Pas përfundimit të studimeve dhe doktoraturës pranë Konservatorit “Luigi Cherubini”, ai e vazhdoi formimin e tij artistik në Institutin Suprem të Arteve të Teatrit “Colón” në Buenos Aires, ku është angazhuar rregullisht në produksione operistike, simfonike, tango dhe jazz.

Përveç aktivitetit si interpretues, Evjord Ngjeliu ka ndërtuar edhe një karrierë të rëndësishme pedagogjike. Që nga viti 2012 është pedagog i klarinetës në Shkollën e Specializuar “Carlos Cometto” në Ramos Mejía, pjesë e projektit të orkestrave për fëmijë të Provincës së Buenos Airesit. Më herët ka zhvilluar praktikë pedagogjike pranë Konservatorit “Luigi Cherubini” të Firences. Angazhimi i tij në edukimin muzikor është shquar për përkushtimin ndaj formimit të brezave të rinj të muzikantëve dhe për promovimin e metodave bashkëkohore të mësimdhënies.

Që prej pesë vitesh, Ngjeliu është pjesëtar në Orkestrën e Teatrit Kombëtar të Operës dhe Baletit në Tiranë.

Friederike Starkloff

Friederike Starkloff konsiderohet një nga violinistet më të shquara të brezit të saj, e vlerësuar për interpretimin e thellë, ekspresiv dhe shumëngjyrësh artistik. E lindur në vitin 1990 në Chemnitz të Gjermanisë, ajo nisi mësimet e para të violinës në moshën pesëvjeçare me Wolfgang Marschner dhe Ariane Mathäus në Fondacionin Pflüger në Freiburg. Më pas studioi me Rainer Kussmaul në Freiburg dhe me Antje Weithaas në Akademinë e Muzikës “Hanns Eisler” në Berlin, ku nga viti 2017 deri në vitin 2022 shërbeu edhe si asistente e saj.

Karriera e saj artistike është shoqëruar me suksese të rëndësishme në konkurse prestigjioze ndërkombëtare. Në vitin 2009 ajo fitoi Çmimin e Dytë në Konkursin Ndërkombëtar të Violinës “Leopold Mozart” në Augsburg, një arritje që i hapi rrugën regjistrimit të albumit të saj debutues me sonatat për violinë të Mozartit, në bashkëpunim me pianistin José Gallardo.

Më pas, Starkloff u vlerësua me Çmimin e Tretë në Konkursin Ndërkombëtar “Johann Sebastian Bach” në Leipzig (2010), në Konkursin “Long-Thibaud-Crespin” në Paris (2014) dhe në Konkursin “Jean Sibelius” në Helsinki (2015). Në vitin 2017 ajo publikoi albumin e saj të dytë, së bashku me violinisten Myvanwy Ella Penny, me vepra për dy violina nga Eugène Ysaÿe dhe Wolfgang Marschner.

Në moshën 24-vjeçare, Friederike Starkloff u emërua koncertmaestre e NDR Radiophilharmonie Hannover, duke u bërë kështu koncertmaestrja më e re në historinë e një orkestre radiofonike gjermane. Që nga sezoni artistik 2023/24, ajo mban postin e koncertmaestres së parë të Orkestrës Simfonike të Bazelit.

Krahas angazhimeve të saj orkestrale, Starkloff zhvillon një aktivitet të pasur si soliste dhe muzikante e muzikës së dhomës, duke bashkëpunuar me artistë të njohur si Markus Becker, Jan Vogler, Leonid Gorokhov, Daniel Schnyder dhe Gerrit Zitterbart. Albumi i saj më i fundit, i publikuar në vitin 2023 nga Genuin Classics, me sonata nga Schulhoff, Janáček, Debussy dhe Antheil, ka marrë vlerësime të larta nga kritika dhe mediat profesionale.

Që nga tetori i vitit 2024, Friederike Starkloff mban titullin e profesoreshës së violinës në Universitetin e Muzikës dhe Arteve Skenike në Stuttgart. Ajo interpreton në një violinë të ndërtuar nga Meike Finckh në vitin 2021, si dhe në një violinë të realizuar nga Julia Maria Pasch në vitin 2014.

Endri Nini

…një mjeshtër i nuancave muzikore dhe një virtuoz i shkëlqyer bashkëkrijues…

Nord-West Zeitung

Endri Nini, një artist i vlerësuar si solist dhe muzikant dhome, është fitues i disa çmimeve kryesore në konkurse ndërkombëtare si konkursi i pianos Ile de-France në Paris, Premio Trio di Trieste në Itali dhe konkursi ndërkombëtar i muzikës së dhomës Kiejstut Bacewicz në Łódź (Poloni). I lindur në Tiranë, Nini studioi me Anita Tartarin, Sontraud Speidel, Kevin Kenner dhe Bernd Goetzke. Ai ka marë impulse të rëndësishme muzikore nga Stephen Kovacevich, Aldo Ciccolini dhe András Schiff. Studimet e muzikës së dhomës ai përfundoi në Hanover me Markus Becker dhe Oliver Wille.

Si muzikant dhome, ai ka performuar me muzikantë të njohur si Albrecht Mayer, Sharon Kam, Sabine Meyer, Daniel Rowland, Gustav Rivinius, Elsbeth Moser, Wolfgang Güttler, Berlin-Tokyo Quartet dhe Eliot Quartett. Nga viti 2012 deri në vitin 2018, Nini ishte një nga anëtarët themelues të Flex Ensemble, me të cilin fitoi disa çmime në konkurse prestigjioze ndërkombëtare të muzikës së dhomës, siç është çmimi i parë në konkursin ndërkombëtar të muzikës së dhomës Robert Schumann në Frankfurt dhe çmimi i parë në Gianni Bergamo Classic Music Award në Lugano. Përveç katër albumeve diskografike “The Arrival of Night” dhe “Au Suivant!” me Flex Ensemble, “Momentum” me violonçelisten Antoaneta Emanuilova dhe “Traum und Trauma” me violinisten Friederike Starkloff, ai ka regjistriuar dhe për stacionet radiofonike si SWR, NDR, Radio 4 Amsterdam dhe RTSH.

Si solist, ai ka performuar me Orkestrën Filarmonike të Baden-Baden, Orkestrën Simfonike të Radio Televizionit Shqiptar, Orkestrën e Dhomës në Karlsruhe dhe Orkestrën e Dhomës së Tiranës. Ai është shfaqur gjithashtu në salla të rëndësishme koncertesh si Concertgebouw Amsterdam, Alte Oper Frankfurt, Qendra Kombëtare për Artet Performuese në Pekin dhe Meistersingerhalle Nuremberg, si dhe në Sommerliche Musiktage Hitzacker, Heidelberger Frühling, Festspiele Mecklenburg-Vorpommern, Festivalin e Annecy, Prussia Cove, Festivalin Ndërkombëtar të Muzikës Goslar dhe Festivalin PODIUM Esslingen.

Endri Nini ka dhënë leksione te muzikës së dhomës në Akademinë Sibelius në Helsinki dhe në Universitetin e Muzikës FRANZ LISZT në Weimar dhe aktualisht është lektor i muzikës dhome në Universitetin e Muzikës dhe Dramës në Rostock. Që nga viti 2022, ai është bashkëdrejtues artistik i Himara International Music Festival.

www.endrinini.com

was bleibt kollektiv | Gentian Doda

Themeluar në vitin 2021, ‘was bleibt kollektiv | Gentian Doda’ bashkon artistë ndërkombëtarë të kërcimit dhe disiplinave të tjera artistike, të përkushtuar ndaj hulumtimit dhe zhvillimit të ideve përmes kapaciteteve shprehëse të trupit. Rrënjosur në një kërkim mbi atë që mbetet përtej çdo manifestimi artistik, kolektivi krijon performanca, filma dhe instalacione që zbulojnë gjendjet njerëzore përmes lëvizjes, ose mungesës së saj, duke ndërtuar lidhje mes kujtesës personale, transformimeve historike dhe tensioneve bashkëkohore.

Praktika artistike e Dodës ndërthur kërcimin, filmin dhe instalacionin. E zhvilluar gjatë më shumë se dy dekadave përvoje ndërkombëtare, vepra e tij eksploron tensionet midis kujtesës individuale dhe asaj kolektive, zhvendosjes, identitetit dhe ndryshimit, duke lidhur përvojat intime njerëzore me realitete më të gjera shoqërore dhe historike. Krijimet e tij karakterizohen nga një gjuhë estetike bashkëkohore që synon të zbulojë atë që mbetet nën narrativat e dukshme dhe strukturat e vendosura.

Që nga fillimi i karrierës së tij koreografike, Doda ka krijuar vepra për kompani të rëndësishme të kërcimit, teatro, muze dhe festivale në të gjithë Evropën dhe më gjerë, duke përfshirë Compañía Nacional de Danza (Spanjë), Staatsballett Berlin, Scapino Ballet Rotterdam, Greek National Ballet, The Juilliard School, Teatro Massimo di Palermo dhe Prado Museum. Paralelisht me aktivitetin e tij koreografik, ai ka zgjeruar praktikën në fushën e filmit dhe instalacionit, duke thelluar qasjen ndërdisiplinore të kolektivit.

Projektet e kolektivit janë prezantuar në nivel ndërkombëtar, përfshirë pjesëmarrjen në Biennale Arte 2024 përmes bashkëpunimit me Pavijonin e Meksikës. Veprat e Dodës kanë marrë vlerësim nga publiku dhe kritika, duke u nderuar me çmime të shumta koreografike dhe filmike.

Drejtimi artistik & koreografia: Gentian Doda
Muzika: Çezar Aliaj
Performues: Rosella Pellicciotti, Fjorald Doci
Ndërhyrje muzikore live: Rajkard Bardhi

Trio Sunsnote

Trio Sunsnote lindi nga një miqësi e hershme muzikore dhe njerëzore mes tre muzikantëve të shquar francezë: oboistit Vincent Tizon, klarinetistes Anne-Lise Clément dhe fagotistit Mathieu Moreaud.

Të vlerësuar sejcili për veprimtarinë e tyre artistike si muzikantë orkestre, interpretues të muzikës së dhomës dhe promovues të muzikës bashkëkohore, ata u bashkuan në vitin 2024 për të themeluar Trio Sunsnote dhe për të ndjekur vizion te përbashkët artistike, të mbështetur në ekselencë, kuriozitet dhe dialog muzikor.

Që prej krijimit , trio ka marrë pjesë në festivale dhe koncerte në Paris, Dordogne, Rivierën Franceze dhe rajonin e Piemontes në Itali. Interpretimet e tyre në kuadër të Alba Music Festival u pritën me interes dhe vlerësim nga publiku, duke shënuar një etapë të rëndësishme në zhvillimin e ansamblit.

I përkushtuar promovimit të repertorit të muzikës së dhomës për oboe, klarinetë dhe fagot, Trio Sunsnote eksploron një trashëgimi të pasur dhe të larmishme veprash, që përfshin kryevepra klasike, vepra të rizbuluara dhe krijime bashkëkohore. Përmes një interpretimi të rafinuar, muzikalitetit të lartë dhe ndërthurjes së veçantë të ngjyrave timbrike që ofrojnë këto tre instrumenta, ansambli synon t’i përcjellë publikut elegancën, gjallërinë dhe thellësinë e këtij repertori të jashtëzakonshëm.